ஈரானுக்குள் வெடிக்கப்போகும் உள்நாட்டுப் போர்?

ஈரானுக்குள் வெடிக்கப்போகும் உள்நாட்டுப் போர்? குர்திஷ் கிளர்ச்சியாளர்களுக்கு ஆயுதம் வழங்க அமெரிக்க உளவுத்துறை இரகசியத் திட்டம்!

மத்திய கிழக்கில் ஏற்கனவே போர் மேகங்கள் சூழ்ந்துள்ள நிலையில், ஈரானிய அரசாங்கத்தை உள்ளிருந்தே பலவீனப்படுத்தும் நோக்கில் அமெரிக்கா ஒரு மாபெரும் உள்நாட்டுப் போரை (Civil War) அங்கு தூண்டத் திட்டமிட்டுள்ளதாக அதிர்ச்சியூட்டும் தகவல்கள் வெளியாகியுள்ளன. அமெரிக்க உளவுத்துறையான சி.ஐ.ஏ (CIA), ஈராக்கில் இயங்கும் குர்திஷ் (Kurdish) ஆயுதக் குழுக்களுக்கு ஆயுதங்களை வழங்கி, ஈரானுக்குள் ஒரு பாரிய கிளர்ச்சியை (Uprising) உருவாக்க வியூகம் வகுத்துள்ளமை தற்போது அம்பலமாகியுள்ளது.

எல்லையில் குவியும் குர்திஷ் படைகள்

அமெரிக்காவின் இந்தத் திட்டத்திற்கு அமைவாக, குர்திஸ்தான் சுதந்திரக் கட்சியின் (Kurdistan Freedom Party) ஆயுததாரிகள் ஈரானின் எல்லைப் பகுதியான சுலைமானியா (Sulaymaniyah) மாகாணத்தில் பெருமளவில் குவிக்கப்பட்டுள்ளனர். இந்தத் தகவலை உறுதிப்படுத்திய அந்த அமைப்பின் முக்கிய அதிகாரி கலீல் நாதிரி (Khalil Nadiri), தமது படைகள் ஈரானுக்குள் ஊடுருவத் தயார் நிலையில் ('Standby') வைக்கப்பட்டுள்ளதாக அசோசியேட்டட் பிரஸ் (AP) செய்தி நிறுவனத்திற்குத் தெரிவித்துள்ளார்.

அதேவேளை, ஈரானிய-குர்திஷ் கிளர்ச்சிக் குழுவான 'கோமலா' (Komala) அமைப்பும், கள நிலைமைகள் சாதகமாக மாறும் பட்சத்தில் அடுத்த ஒரு வாரத்திற்குள் ஈரானிய எல்லையைக் கடந்து தாக்குதல்களை ஆரம்பிக்கத் தயாராக இருப்பதாக எச்சரித்துள்ளது.

டிரம்ப் மற்றும் தலாபானி இடையிலான இரகசியப் பேச்சுவார்த்தை

இந்தக் கிளர்ச்சிக்கான ஆயத்தங்கள், அமெரிக்க ஜனாதிபதி டொனால்ட் டிரம்ப் மற்றும் ஈராக்கின் குர்திஷ் அரசியல் கட்சியான PUK-இன் தலைவர் பாஃபெல் தலாபானி (Bafel Talabani) ஆகியோருக்கிடையிலான தொலைபேசி உரையாடலின் பின்னரே தீவிரமடைந்துள்ளன. ஈரானுக்கு எதிரான நடவடிக்கைகளில் குர்திஷ் குழுக்களை முழுமையாக அணிதிரட்டுவதே இந்த உரையாடலின் பிரதான நோக்கம் என சி.என்.என் (CNN) மற்றும் எக்ஸியோஸ் (Axios) போன்ற சர்வதேச ஊடகங்கள் சுட்டிக்காட்டியுள்ளன. அமெரிக்காவின் இலக்குகளைப் புரிந்துகொள்வதற்கும், வலுவான கூட்டணியை அமைப்பதற்கும் டிரம்ப் இந்த உரையாடலின் ஊடாக அழைப்பு விடுத்துள்ளதாக PUK கட்சி உத்தியோகபூர்வமாக அறிவித்துள்ளது.

பதற்றத்தில் ஈரான்; குற்றச்சாட்டுகளை மறுக்கும் அரச ஊடகங்கள்

தமது எல்லைகளில் குர்திஷ் போராளிகளின் நகர்வுகள் அதிகரித்துள்ளதைத் தொடர்ந்து ஈரான் கடும் பதற்றமடைந்துள்ளது. ஈரானிய வெளிவிவகார அமைச்சர் அப்பாஸ் அராக்ச்சி (Abbas Araghchi), குர்திஷ் தலைவர் தலாபானியைத் தொலைபேசியில் தொடர்புகொண்டு, எல்லையில் இடம்பெறும் "பயங்கரவாத நகர்வுகள்" குறித்துக் கடுமையான எச்சரிக்கையை விடுத்துள்ளார்.

ஆயினும், ஈரானின் அரை-அதிகாரபூர்வ செய்தி நிறுவனமான 'தஸ்னிம்' (Tasnim), குர்திஷ் போராளிகள் ஈரானுக்குள் ஊடுருவியுள்ளதாக வெளியாகும் செய்திகளை முற்றாக மறுத்துள்ளது. ஈலாம், கெர்மன்ஷா மற்றும் மேற்கு அசர்பைஜான் ஆகிய எல்லைப் பகுதிகளில் எவ்வித அசம்பாவிதங்களும் இடம்பெறவில்லை எனவும், இது அமெரிக்க ஊடகங்களின் உளவியல் ரீதியான பொய்ப்பிரச்சாரம் எனவும் ஈரான் தெரிவித்துள்ளது. ஈரானிய-குர்திஷ் கட்சிகளின் கூட்டணியும் தாம் தரைவழித் தாக்குதல்களை இன்னும் ஆரம்பிக்கவில்லை எனத் தந்திரோபாயமாகக் குறிப்பிட்டுள்ளது.

வெளிநாடுகளின் நேரடித் தாக்குதல்களை விட, உள்நாட்டில் சிறுபான்மையினரான குர்திஷ் மக்களைப் பயன்படுத்தி அமெரிக்கா முன்னெடுக்கும் இந்த 'உள்நாட்டுப் போர்' வியூகம், ஈரானிய அரசாங்கத்திற்கு ஒரு மாபெரும் இருத்தலியல் சவாலாக (Existential Threat) உருவெடுத்துள்ளது என்பதே சர்வதேச அரசியல் அவதானிகளின் கருத்தாகும்.