போதைவஸ்து பாவனையாளர்களின் ஜனாஸாக்களுக்கு பிரத்தியேகமான இடம்.

கலாபூஷணம் பரீட் இக்பால் - யாழ்ப்பாணம்*

காத்தான்குடி அல் அக்ஸா பெரிய ஜும்ஆ பள்ளிவாசல் போதைவஸ்து பாவனையாளர்களின் ஜனாஸா விடயத்தில் எடுத்த தீர்மானம் வரவேற்கத்தக்கது. இந்த தீர்மானத்தை இலங்கையிலுள்ள சகல பள்ளிவாசல்களும் நடைமுறைக்கு கொண்டு வருவது வரவேற்கத்தக்கதுமானதும் ஆரோக்கியமானதும் ஆகும். இது ஒரு நல்ல முன்மாதிரியான விடயமாகும்.

போதைப்பொருள் பயன்படுத்தும் மற்றும் வியாபாரம் செய்பவர்களுடைய ஜனாஸாக்கள் காத்தான்குடி அல் அக்ஸா ஜூம்ஆ பள்ளிவாசல் மையவாடியில் அவர்களுக்காக பிரத்தியேகமாக ஒதுக்கப்பட்டுள்ள இடத்தில் அடக்கம் செய்யப்படும்.

புதிய காத்தான்குடி அல் அக்ஸா பெரிய ஜும்ஆப் பள்ளிவாசல் ஜமாஅத்தார்களுக்கு விடுக்கும் மிக முக்கியமான அறிவித்தலும் பிரகடனமும்.

03.12.2022 ஆம் திகதி புதிய காத்தான்குடி அல் அக்ஸா பெரிய ஜும்ஆ பள்ளிவாசல் நம்பிக்கையாளர் சபையின் மாதாந்த கூட்டத்தில் எடுக்கப்பட்ட தீர்மானத்திற்கு அமைய பின்வரும் விடயங்கள் பிரகடனப்படுத்தப்படுகின்றன.

கடந்த சில மாதங்களாக தமது பகுதியில் போதைப் பொருட்களின் பாவனை அதிகரித்து காணப்படுவதுடன் அதன் விளைவுகளும் மிக மோசமாக காணப்படுவதனால் பின்வரும் விடயங்கள் - 2023 ஜனவரி 1ஆம் திகதியில் இருந்து அமுல்படுத்தப்படவுள்ளன.

போதைப்பொருள் பயன்படுத்தும் மற்றும் வியாபாரம் செய்யும் இல்லங்களில் நடைபெறும் திருமணத்திற்கு தமது பள்ளிவாசலினால் எவ்வித ஒத்துழைப்பும் வழங்கப்படமாட்டாது.

போதைப்பொருள் பயன்படுத்தும் மற்றும் வியாபாரம் செய்யும் இல்லங்களில் நடைபெறும் ஜனாஸாக் கடமைகளுக்கு தமது பள்ளிவாசலினால் எவ்வித ஒத்துழைப்பும் வழங்கப்படமாட்டாது.

போதைப்பொருள் பயன்படுத்தும் மற்றும் வியாபாரம் செய்பவர்களுடைய ஜனாஸாக்கள் தமது மையவாடியில் அவர்களுக்காக பிரேத்தியேகமாக ஒதுக்கப்பட்டுள்ள இடத்தில் அடக்கம் செய்யப்படும்.

போதைப்பொருள் பாவனையாளர்கள் மற்றும் வியாபாரிகளின் பெயர் விபரங்கள் விளம்பரப் பலகை மூலம் காட்சிப்படுத்தப்படும்.

போதைப்பொருள் பாவனையாளர்கள் மற்றும் வியாபாரிகளின் விபரங்களை உயர் அதிகாரிகளிடம் தெரியப்படுத்தி மிகக் கடுமையான சட்ட நடவடிக்கை மேற்கொள்ளப்படும்.

போதைப்பொருள் பாவனையாளர்கள் மற்றும் வியாபாரிகளின் மஹல்லா உரிமம் இரத்துச் செய்யப்படும்.

எனவே, மேற்குறிப்பிட்ட விடயங்களை கருத்திற்கொள்ளுமாறு மிக தாழ்மையுடன் கேட்டுக்கொள்கிறார்கள்.

இந்த தீர்மானங்களை இலங்கையிலுள்ள சகல பள்ளிவாசல்களும் பிரகடனப்படுத்துவது ஆரோக்கியமான விடயமாகும்.

*கலாபூஷணம் பரீட் இக்பால் - யாழ்ப்பாணம்*