பகலிலும் இருளப்போகும் பூமி

 

• 

வானியல் அதிசயங்களில் மிகவும் அரிதான 'முழு சூரிய கிரகணம்' (Total Solar Eclipse) சரியாக இரண்டு ஆண்டுகளுக்குப் பிறகு, வரும் ஆகஸ்ட் 12ஆம் திகதி நிகழவிருக்கிறது. உலகெங்கிலும் உள்ள வானியல் ஆய்வாளர்கள் மற்றும் விண்வெளி ஆர்வலர்கள் இந்த அரிய நிகழ்வுக்காக இப்போதே ஆவலுடன் காத்திருக்கத் தொடங்கியுள்ளனர்.

சூரியனுக்கும் பூமிக்கும் இடையே நிலவு கடந்து செல்லும்போது, சூரியனின் ஒளி பூமியின் குறிப்பிட்ட சில பகுதிகள் மீது விழாமல் நிலவின் நிழல் மறைக்கும் நிகழ்வே முழு சூரிய கிரகணம் எனப்படுகிறது.

பகல் நேரத்தில் முற்றாக இருளப்போகும்நாடுகள்

இந்த முழு சூரிய கிரகணத்தின் போது கிரீன்லாந்து, ஐஸ்லாந்து, வடக்கு ஸ்பெயின் மற்றும் வடகிழக்கு போர்த்துக்கல் ஆகிய நாடுகள் முற்றிலும் இருளில் மூழ்கும் என்று கணிக்கப்பட்டுள்ளது. இப்பகுதிகளில் பகல் நேரத்திலேயே சூரியன் முழுமையாக மறைந்து, இரவு போன்ற சூழல் உருவாகும்.

அதேவேளையில் ஐரோப்பா, ஆப்பிரிக்கா மற்றும் வட அமெரிக்க நாடுகளின் குறிப்பிட்ட சில பகுதிகளில், சூரியன் பகுதியளவாக மறைக்கப்படும் 'பகுதி சூரிய கிரகணம்' (Partial Solar Eclipse) தென்படும்.

வரலாற்றுப் பின்னணியும் நாசாவின்அறிவிப்பும்

கடந்த 2024ஆம் ஆண்டு ஏப்ரல் மாதம் மெக்சிகோ, அமெரிக்கா மற்றும் கனடா ஆகிய நாடுகளில் முழு சூரிய கிரகணம் மிகத் தெளிவாகத் தென்பட்டது. எனினும், ஸ்பெயின் நாட்டில் இதற்கு முன்னர் கடந்த 1905ஆம் ஆண்டில்தான் முழு சூரிய கிரகணம் நிகழ்ந்தது. அதன் பிறகு, நீண்ட இடைவெளிக்கு பின் இப்பொழுதுதான் அங்கு முழு சூரிய கிரகணம் நிகழவுள்ளது.

இந்த முழு சூரிய கிரகணத்தை இந்தியாவில் இருந்தோ அல்லது இலங்கையில் இருந்தோ நேரடியாகப் பார்க்க முடியாது. எனினும், அமெரிக்க விண்வெளி ஆராய்ச்சி நிறுவனமான நாசா (NASA) போன்ற அதிகாரப்பூர்வ இணையதளங்கள் வாயிலாக உலக மக்கள் அனைவரும் இதனை நேரலையில் (Live) கண்டுகளிக்கலாம்.

 அடுத்தடுத்த கிரகணங்கள் எப்போது?

• 2027 ஆகஸ்ட்: அடுத்த முழு சூரிய கிரகணம் நிகழும். இது ஸ்பெயின், வட ஆப்பிரிக்கா, சவூதி அரேபியா மற்றும் ஏமன் ஆகிய நாடுகளில் மட்டுமே தென்படும் என நாசா அறிவித்துள்ளது.
• 2033 மார்ச் 30: அதுவரை அமெரிக்காவில் முழு சூரிய கிரகணத்தைக் காண வாய்ப்பே இல்லை. அன்றைய தினமும் சில குறிப்பிட்ட பகுதிகளில் மட்டுமே அது தென்படும்.
• 2044: ஒட்டுமொத்த அமெரிக்காவிலும் முழு சூரிய கிரகணத்தைக் காண்பதற்கு 2044ஆம் ஆண்டு வரை காத்திருக்க வேண்டும் எனத் தரவுகள் தெரிவிக்கின்றன.

வெறுங்கண்களால் நேரடியாகப் பார்க்கலாமா?

முழு சூரிய கிரகணத்தை எக்காரணம் கொண்டும் வெறுங்கண்களால் பார்க்கக் கூடாது என்று விஞ்ஞானிகள் எச்சரிக்கின்றனர்.

"சூரியனைச் சந்திரன் முற்றிலும் மறைத்திருக்கும்போது, அதிலிருந்து திடீரென வெளிப்படும் லேசான ஒளிக் கதிர்கள் மிக அதிக வீரியத்துடன் இருக்கும். இதனை நேரடியாகப் பார்ப்பது கண்களின் விழித்திரையைப் பாதித்து, கண்பார்வையை முற்றாகப் பறிக்கும் அபாயத்தைக் கொண்டது."

எனவே, சூரிய கிரகணத்தைக் காண்பதற்கென பிரத்யேகமாக வடிவமைக்கப்பட்ட 'சோலார் ஃபில்டர்' (Solar Filters) கண்ணாடிகளை மட்டுமே பயன்படுத்த வேண்டும் என அறிவுறுத்தப்பட்டுள்ளது.