80க்கும் மேற்பட்ட குழந்தைகளை தத்தெடுத்து வளர்த்தார்… அவர்களில் பலர் இன்று உயிருடன் இல்லை

 “80க்கும் மேற்பட்ட குழந்தைகளை தத்தெடுத்து வளர்த்தார்… அவர்களில் பலர் இன்று உயிருடன் இல்லை” — இந்த மனிதரை கண்டிப்பாக அறிந்திருக்க வேண்டும்

மருத்துவர்கள் “இவர்களுக்கு அதிக நாட்கள் ஆயுள் இல்லை” என்று கூறிய குழந்தைகளுக்கு இறைவனின் அருளாக மாறிய மனிதர் ஒருவர் இந்த பூமியில் இருக்கிறார். அந்த மனிதர் தான் முகமது ப்சீக். மரணத்தை எதிர்நோக்கி வாழும் குழந்தைகளை தத்தெடுத்து, அவர்களின் கடைசி நாட்களை அன்பும் மகிழ்ச்சியும் நிறைந்ததாக மாற்றி, அமைதியாக இறைவனிடம் அனுப்பிவைக்கும் மனிதநேயத்தின் உருவம்.

பல ஆண்டுகளாக கடுமையான நோய்களால் பாதிக்கப்பட்ட குழந்தைகளை தனது வீட்டில் பராமரித்து வருகிறார் முகமது. சில குழந்தைகளுக்கு பார்வை இல்லை, சிலருக்கு கேள்வித்திறன் இல்லை, சிலரின் உடல் உறுப்புகள் இயங்காது, இன்னும் சிலர் பிறவியிலேயே கடுமையான உடல்நலப் பிரச்சினைகளுடன் பிறந்தவர்கள். “இவர்களுக்கு இன்னும் சில நாட்களோ மாதங்களோ மட்டுமே ஆயுள் இருக்கலாம்” என்று மருத்துவர்கள் கூறும் குழந்தைகள்தான் பெரும்பாலும் இவரிடம் வருகின்றனர்.

அமெரிக்காவின் லாஸ் ஏஞ்சல்ஸ் நகரில் உள்ள foster care அமைப்பில் இப்படிப்பட்ட கடுமையான நோயால் பாதிக்கப்பட்ட குழந்தைகளை பராமரிக்க முன்வருபவர்கள் மிகவும் குறைவு. அதனால் பல குழந்தைகள் மருத்துவமனைகளிலோ தனிமையிலோ வாழ்க்கையை கழிக்க வேண்டிய நிலை ஏற்படுகிறது. ஆனால் முகமது ப்சீக் அந்த குழந்தைகளை தனது வீட்டிற்கு அழைத்து வந்து, சொந்த குடும்ப உறுப்பினர்களைப் போல அன்புடன் கவனித்து வருகிறார்.

1980களில் அமெரிக்காவிற்கு குடிபெயர்ந்த முகமது, தனது மனைவி டோனாவுடன் சேர்ந்து இந்த மனிதநேயப் பணியை தொடங்கினார். 2015ஆம் ஆண்டு மனைவி உயிரிழந்த பிறகும், அவர் தனது சேவையை நிறுத்தவில்லை.

முகமதின் சொந்த மகன் ஆதத்திற்கும் பிறவியிலேயே கடுமையான உடல் ஊனங்கள் இருப்பதால், இப்படிப்பட்ட குழந்தைகளின் வலியை அவர் மிகவும் ஆழமாக உணர்கிறார். மனைவியை இழந்த பிறகும் இன்று வரை குழந்தைகளை பாதுகாத்து, அவர்களுக்கு அன்பும் மகிழ்ச்சியும் அளிக்க அவர் தொடர்ந்து பாடுபட்டு வருகிறார்.

நாற்பதுக்கும் மேற்பட்ட குழந்தைகள் அவரது கரங்களில் அமைதியாக இறுதி மூச்சை விட்டுள்ளனர். ஒரு தந்தையின் அன்பை அளித்து, “இந்த உலகில் நீங்கள் தனியாக இல்லை” என்பதை அவர்கள் உணரும்படி அவர் பார்த்துக் கொண்டார்.

“இறைவன் இந்த பூமியில் வாழ்கிறாரா?” என்று யாராவது கேட்டால், இப்படிப்பட்ட மனிதர்களைக் காட்டினால் போதும். சிலர் பிரார்த்தனைகளில் இறைவனை தேடுகிறார்கள்; சிலர் தங்களின் வாழ்க்கையே பிறருக்காக அர்ப்பணித்து, இறைவனின் உருவமாக மாறுகிறார்கள். அப்படிப்பட்ட அபூர்வமான மனிதர்களில் ஒருவர்தான் முகமது ப்சீக்.

“இந்த உலகில் அவர்கள் தனியாக இல்லை என்றும், அவர்களை உயிராய் நேசிக்க ஒருவராவது இருந்தார் என்றும் உணர்த்தி அனுப்புவதுதான் என் கடமை” என்று நிரூபித்த இந்த மனிதநேய காவலருக்கு நாமும் மரியாதை செலுத்துவோம்.